Balantayan subong nga adlaw, Abril 8, ang pagpatigayon sang ikaapat na nga inquiry sang tri-committee sa Kamara kaangot sa paglapta sang fake news sa social media.
Lakip sa talalupangdon nga bagay subong nga hearing amo nga imbitado ang blogger kag ang anay broadcaster nga si Jay Sonza.
May subpoena man gihapon batok sa former National Task Force to End Local Communist Armed Conflict (NTF-ELCAC) officials nga sanday Lorraine Badoy kag Jeffrey Celis.
Matandaan nga gin-snub nila ang hearing sang Marso 21 nga isa na ka paglapas sa subpoena, kag mahimo na kuntani ma-cite for contempt, apang naghawid pa ang committee sa pag-isyu sang penalidad.
Sandig sa kumpirmasyon ni House tri-committee co-chair Dan Fernandez, gin-imbitar nila liwat ang pro-Duterte bloggers nga sanday Krizette Laureta Chu, Mark Lopez, kag Mary Jane Quiambao Reyes, kag si former press secretary Trixie-Cruz Angeles.
Si Chu kag si Reyes amo ang naghibi kag nagpangayo sang pasaylo sang gingisa sang mga pamangkot sang nagligad nga hearing bangud sa ila “misleading content”; si Lopez naman ang diutayan lang ma-contempt bangud sa sabat sini kaangot sa isyu sa West Philippine Sea; samtang si Cruz-Angeles naman ang nakabulgar nga naka-tambong sila sa seminar nga gin-sponsor sang China.
Ang iban pa nga imbitado subong nga adlaw nagalakip kay Elizabeth Joie Cruz (Joie De Vivre), Dr. Ethel Pineda Garcia, Alvin Curay, Ma. Khristine Claud Curay, Epifanio Labrador, Manuel Mata Jr. (Kokolokoy), Dr. Richard Tesoro Mata (Dr. Richard and Erika Mata), George Ahmed Paglinawan (Luminous by Trixie & Ahmed), Aeron Peña (Old School Pinoy), Ramon Gerardo B. San Luis kag Elijah San Fernando (Eli).
Magluwas sa ila, may gin-subpoena ang joint panel nga 24 vloggers kag influencers nga natalana mag-testify subong nga adlaw. May nauna na nga paandam halin kay Abang Lingkod Party-list Rep. Joseph Stephen “Caraps” Paduano nga co-chairman sang tri-comm nga mahimo i-isyu ang contempt citations kag ipa-detain ang 24 nga gin-subpoena kun indi sila magsipot.
Ginalauman man nga magatambong subong nga adlaw ang mga tiglawas halin sa tech giants nga Facebook, TikTok, kag Google.
Ang nauna nga hearings sang tri-comm ang ginpatigayon sang Pebrero 8, ginsundan sang Pebrero 19, kag ang ikatatlo sang Marso 21.
Nag-ugat ang inquiry halin sa privilege speeches ni Surigao del Norte 2nd District Representative Ace Barbers kaangot sa online attacks halin sa “trolls and malicious vloggers” amo man sa ginaalegar nga Chinese propaganda sa West Philippine Sea.
