Wala nakapugong ang kalisod sa kabuhi kay Rev. Father Alex Apalit agud malab-ot ang iya tinutuyo nga misyon samtang ini ang nagakabuhi sa kalibutan.
Sa iya pagpakigbahin sang iya istorya, ginlaragway sini nga mahimo na niya nga matawag nga “platonic family” ang iya nga pamilya bangud man nga nagalupad ang mga galamiton sa ila balay kon ang iya amay kag iloy ang naga-inaway.
Suno kay Father Alex Apalit, sa ila pito ka mga mag-utod, siya ang pinakamagulang rason man nga masami siya nga ginasugo nga magpangutang sa tindahan.
Ang masakit lang para sa natungdan, mas malaba pa ang listahan sang ilimnon kon ipaanggid sa ila kalan-on.
Gintuad man sini nga may mga bes nga indi malikawan nga madalahig sila nga mga kabataan sa inaway sang ila ginikanan.
Dugang niya nga kon indi mapaukpan sang kaugot sang iya amay ang iya iloy, ang kasapatan nga nagapahimunong amo ang nagasalo sang kaugot.
Bangud sa lubong man sa utang, masami sila nga nagabalibad kon may nagapanukot na sang utang.
Tungod sang kapigaduhon, may tion nga nagakalipong si Father Apalit sa iya eskwelahan bangud wala na sang ginakaon.
Balinghoy kag lubi, ini ang masami nga iya sud-an.
Ang pagtangla sa langit nga may dala nga mga luha sa mata kag magsiling nga, “𝗗𝗶𝗼𝘀 𝗸𝗼, 𝗗𝗶𝗼𝘀 𝗸𝗼, 𝗻𝗴𝗮𝗮 𝗯𝗮𝗹𝗮 𝗴𝗶𝗻𝗽𝗮𝘁𝘂𝗺𝗯𝗮𝘆𝗮𝗮𝗻 𝗺𝗼 A𝗸𝗼.”
Sa amo nga tion, nabatyagan sini nga daw tuman ka layo sa ila ang Diyos nga daw indi na makita ang kahimtangan sang ila nga pamilya.
Apang sa likod sang tanan nga pagbasol sa Ginoo, amat-amat nga nagbag-o sang may nag-abot nga mga ketikista sa ila eskwelahan kag gintudlo-an sila nga magpangamuyo sang Santos nga rosaryo kag magbasa sang biblia.
Sa bulig, natun-an ni Father Apalit nga bisan ano ka dako nga problema, dapat indi madulaan sang paglaum sa Diyos.
Tuig 2002, sang nagsulod siya sa seminaryo kon sa diin, wala pa siya nagpanugid sa iya ginikanan.
Sa sulod sang duha ka tuig nga wala nakapauli sa ila balay, maid-id sini nga ginpangamuyo-an ang iya pamilya nga magbag-o ang ila ang pangabuhi.
Sang nakabalik siya sa ila balay, nasurpresa ini bangud wala na sang bisyo ang iya mga ginikanan, apang isa na sila ka Baptist.
Apang sa piyak sini, bisan pa nga lain ang ila nga ginatuohan, nakit-an sini sa gihapon nga ginsabat sang Ginoo ang iya mga ginpangamuyo kag kon paano ginbag-o sang Dios ang ila nga kabuhi.
Para ka Father Apalit, sa tunga sang pag-antos kag kalisod, ang presensya sang Dios ang wala nagadula, kundi nagahatag sang kabakod sa tagsa ka tikang sa dalan nga aton nga ginaagyan.
