ILOILO CITY– Nangin matawhay ang ikaduha nga adlaw sang implementasyon sang weekend block off sa syudad sang Iloilo.
Sa interview sang Bombo Radyo kay Public Safety and Transportation Management Office head, Jeck Conlu, iya ginpahayag nga matawhay kag nagasunod sa kun ano ang ginapatuman sa syudad sang Iloilo.
Suno kay Conlu, nagapasalamat man siya sa mga opisyales sang tagsa ka barangay bangud sa kooperasyon kag pagbulig sa implementasyon sang ginapatuman nga pagsulundan.
Pahayag pa ni Conlu, may pila lang sila ka mga ginsaway nga ginalakipan sang mga nagapalupad sang borador kag mga tyangge nga bukas sa gihapon.
Pagpatak sang las tres suno kay Conlu, nagalibot ang patrol sang Public Safety and Transportation Management Office lakip na ang mga kapulisan, agud magsekyar sa kabug-usan sang syudad.
Nahibaluan nga sa una nga adlaw sang implementasyon sang weekend block off, 31 ka tricycle ang nagkaladakpan kag 11 ka mga pumuluyo nga nagalakat sa dalan nga wala sang quarantine pass.
