Ginalauman sang Passi City Government nga wala sang mangin pagbag-o sa mainit kag daku nga suporta sang mga taga-syudad sang Passi sa bloodletting activity nga patigayunon subong nga adlaw, Nobyembre 27.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga pasakupan sang Reserve Officers’ Training Corps (ROTC) sang Passi City College kag sang farmer’s association ang aktibidad.
Ini ang partnership sang “Ugyon para sa Passinhon, Dugo Ko, Kabuhi Mo” program sang local government unit, Dugong Bombo sang Bombo Radyo Philippines kag Western Visayas Medical Center (WVMC).
Sang Martes, Nobyembre 24, naglab-ot sa 222 ang nangin successful blood donors kag natipon ang 99, 900 CC sang dugo ukon equivalent sa kapin isa ka gatos nga litro (100 liters).
Liwat nga nagpasalig ang alkalde nga tumanon ang tanan nga minimum health protocols batok sa COVID-19 ilabi na bangud malapad ang Passi City Arena kag sarang gid ma-practice ang physical distancing.
