Plastado na ang tanan para sa ikatatlo nga State of the Nation Address (SONA) ni President Ferdinand Marcos, Jr. sa Batasang Pambansa complex ‘las kuatro karon sa hapon, Hulyo 22.
Diri ginalauman nga iga-outline sang chief executive ang mga plano sang iya administrasyon, mga polisa, kag mga prayoridad para sa pag-umwad sang nasyon.
Antes sini, ginpakita sang Presidential Communications Office ang mga laragway sang presidente nga naga-rehearse sang iya speech kahapon apang wala na ginpatpat kun ano ang highlights sini. Sa baylo, ginsiling sang opisina nga magasuksok ang presidente sang barong nga himo sang lain-lain nga Filipino artisans halin sa Lucban, Quezon, Taal, Batangas kag Aklan.
Nahibaluan nga 23,000 ka police personnel ang gin-deploy para sa seguridad sa SONA kun sa diin 6,000 diri ang assigned sa venue mismo sang event.
Wala sang na-monitor nga security threat ang Philippine National Police (PNP) apang ginpasalig nga aktibo gihapon ang ila nga intelligence monitoring para sa safety sang presidente kag tanan nga magatambong.
Nagpahayag man ang Armed Forces of the Philippines (AFP) nga preparado ini sa pagpadala sang dugang nga tropa sa pag-augment sa seguridad.
Matandaan nga nagtaas ang kahangawa sang publiko sa seguridad sa sini nga event kasunod sang pahayag ni Vice President Sara Duterte sang nagligad nga sinemana nga indi ini magtambong sa SONA kag gina-designate sini ang iya kaugalingon bilang “designated survivor.”
Kun sa Estados Unidos sang Amerika, ini nga termino ang nagatumod sa tawo nga amo ang assigned nga magseparar kag magbulos sa presidente kag ginapain ini sa separado nga lugar sa tion nga magtipon ang chief executive kag ang mga lideres sang nasyon.
Bilang kabahin sang sini nga security measures, naka-lockdown ang Batasang Pambansa halin pa sang nagligad nga Sabado, Hulyo 23.
