Sang nagligad nga adlaw, matunog nga ginahambalan ang isa ka ilaga nga nakit-an sang isa ka pasahero sa Ninoy Aquino International Airport.
Ini ya, didto naman sa Sri Lanka, pero sa sulod gid sang eroplano!
Kag nakahibalo ka bala?
Sang nakit-an ang ilaga sa sulod sang SriLankan Airlines Airbus A330 flight nga halin sa syudad sang Lahore sa Pakistan, nag-desisyon ang airline management nga indi na pagpalupadon ang eroplano sa sulod sang tatlo ka adlaw.
Importante ini suno sa management agud nga masiguro nga wala gin-it-it sang ilaga ang mga kritikal nga parte sang eroplano.
Ginsiling man sang management nga sang tion nga nakit-an ang ilaga, wala gid ginpahalin ang eroplano tubtub nga wala nasiguro nga patay na ini.
Antes sini, nahibaluan nga ang airline nga ginapanag-iyahan sang state ang napierde na sang masobra $1.8 bilyon sa katapusan sang Marso 2023.
Tatlo ka iban pa nga eroplano sang SriLankan Airline ang na-ground man sang masobra isa ka tuig.
Ini ang rason nga indi ini basta-basta nga problema suno sa aviation minister bangud posible nga may investors na kuntani nga interesado kuhaon ang airline nga lubong sa utang, apang posible nga mag-isol bangud sa problema sa ilaga.
