Padayon ang pagpangita sang Iloilo Electric Cooperative (ILECO) 1 sang dugang nga power suppliers agud mapanubuan ang rate sang kuryente.
Nahibaluan nga ginaduso subong sa Kamara ang pagpasangkad sang franchise area sang More Electric and Power Corporation (MORE Power) sa second kag fourth district sa probinsya sang Iloilo.
Kun maaprubahan ang hagna, pat-od nga maapektuhan ang sales kag ma-stranded man ang contracts sa suppliers sang ILECO.
Sa interview sang Bombo Radyo kay Engr. Mike Paguntalan, General Manager sang ILECO 1, iya ginpahayag nga nagaplano sila nga makakuha sang kontrata sa Power Sector Assets and Liabilities Management Corporation (PSALM) nga may manubo nga rate sang kuryente.
Apang bangud sa naguba nga submarine cable sang National Grid Corporation of the Philippines sa Amlan, Negros Oriental matapos ang ginpatigayon nga dredging operation sang Department of Public Works and Highways, mahimo nga congested ukon limitado pa ang suplay sang kuryente sa PSALM.
Sa pihak sini, ginpahayag ni Paguntalan nga manugtapos na sini nga Nobyembre ang isa nila ka emergency power purchase agreement kag kun mapahanugutan sang Department of Energy, iga-proseso nila gilayon ang procurement kun makakita sila sang barato nga kontrata kun sa diin sila maka-avail sang barato nga power supply.
