Nagpasalig ang Iloilo Electric Cooperative (ILECO) II nga pasanyugon ang ila serbisyo kag panubuan ang presyo sang kuryente.
Sa subong, P12.20 per kilowatt hour ang ginabayaran sang mga konsumidor sa idalom sang serbisyo sang ILECO II.
Nahibaluan nga gin-file na sa Kamara ang hagna nga House Bill 10258 nga nagaduso nga i-expand pa ang prangkisa sang More Electric and Power Corporation (MORE Power) sa second kag fourth district sa probinsya sang Iloilo.
Ini ang ginduso nanday Iloilo City Lone Disrict Representative Julienne Baronda, Iloilo Second District Representative Michael Gorriceta, kag Iloilo Fourth District Representative Braeden John Biron.
Sa interview sang Bombo Radyo kay Rexus Lesondato, officer-in-charge sa Institutional Services Department sang ILECO II, iya ginpahayag nga nahangpan man nila ang sentyemyento sang lokal nga mga opisyal.
Bangud sini, padayon man ang ila deliberasyon agud nga masolusyunan ang pila ka mga isyu nga ginapalab-ot sang ila mga konsumidor.
Suno naman sa Manager sa Corporate Planning, Information Technology, & Energy Trading Services Department sang ILECO II, magluwas sa power supply nga ila gin-source sa Power Sector Assets and Liabilities Management Corp. (PSALM), nagapangita pa gid sila sang dugang nga power supplier.
Sa interview sang Bombo Radyo kay Engr. Rommier Caro, iya ginpahayag nga ‘long-term plan’ sang ILECO II nga makakuha sang manubo nga rate sang electricity ilabi na kun makakuha sila sang madamo nga suplay sang kuryente.
Pahayag niya, tubtob pa sa 2029 ang ila prangkisa rason nga positibo sila nga mas magsanyog pa ang ila serbisyo.
Nahibaluan nga sakop sang serbisyo sang Ileco II ang Pototan, Mina, Dueñas, Dingle, Passi City, San Enrique, Calinog, Bingawan, Lambunao, Janiuay, Badiangan, Zarraga, New Lucena, Barotac Nuevo, kag Dumangas, Iloilo.
