ILOILO – Nagpasalig ang Iloilo III Electric Cooperative Incorporated ukon ILECO III nga maga-comply ini sa no-disconnection policy para sa mga lifeliners ukon low-income households.
Ang pagpalawig sang no-disconnection policy para sa additional two months (halin sa end-December 2020 tubtob Pebrero 2021) para sa mga lifeliners ang gin-aprubahan ni Presidente Rodrigo Duterte bilang bulig sa mga power consumer sa tunga sang COVID-19 pandemic.
Sa interview sang Bombo Radyo kay Consorcia Peñaranda, general manager sang ILECO III, iya ginpahayag nga indi sila magpang-utod sang linya sang mga kuryente sa mga lifeliners nga indi makabayad nga may falling due date sa Marso 2021.
Nagalain-lain ang lifeline levels sa kada distribution utility ukon electric cooperative. Sa bahin sang ILECO III, ang makabig nga mga lifeliners amo ang may 25 kilowatts hour consumption per month ukon mas manubo pa.
Ginabanta 33,000 ang lifeliners nga nasakupan sang nasambit nga electric cooperative.
Ang no-disconnection policy ang wala nagakahulugan nga libre ang suplay sang kuryente.
Para sa bulan sang Marso, magaumpisa naman ang pagpanghatag sang disconnection notices sa mga konsumidor nga indi makabayad sa ila nga electric bill.
Nag-abiso man si Peñaranda sa publiko nga indi paghulaton nga magtingob ang ila balayran.
Nagapanindugan man si Peñaranda nga collection agent lamang sila kag may mga financial affiliation man ang ILECO III.
Kun indi magbayad ang mga member-consumers pati na ang mga lifeliners, wala man sang ibayad ang ILECO III sa ila nga nga ginabaklan sang kuryente.
