Nagbisita ang rapid response team sang Philippine Embassy sa mga Pilipino nga nawad-an sang puluy-an matapos nag-igo ang missile nga ginpalupad sang Iran sa syudad sang Bnei Brak sa Israel.
16 ka mga Pinoy ang nagatinir sa flat apang isa lamang sa ila ang yara didto sang natabo ang pagsigabong.
Suno sa embahada, maswerte lang nga nakaluwas ini kag wala nasamaran bangud nakahingagaw ini sulod sa bomb shelter ukon sa mamad.
Sa subong, temporaryo lang anay nga nagapuyo sila kaupod sa ila nga mga amo kag mga abyan.
Lakip naman sa gindala sang embassy amo ang bugas, groceries, kag hygiene products. Ginpasalig man sang Department of Migrant Workers (DMW) nga makapangita sila sang bag-o nga apartment.
Subong nga gab-i sang ginbatak sang Department of Foreign Affairs (DFA) sa Level 3 ang crisis alert level 3 sa Iran kag Israel nga nagakahulugan ang voluntary repatriation nga ipatuman gilayon.
Sandig sa data sang gobyerno, may yara sang 30,000 ka mga Pinoy sa Israel kun sa diin kadam-an ang nagatrabaho bilang caregivers; samtang masobra naman sa 1,100 sa Iran.#
