ILOILO CITY – Short circuit ang gintunaan sang sunog sa Barangay Benedicto, Jaro, Iloilo City kun sa diin 72 ka mga pamalay ang naabo kag masobra 100 ka pamilya ang nawad-an sang puluy-an.
Ini ang nagguwa sa imbestigasyon sang Bureau of Fire Protection (BFP).
Sa interview sang Bombo Radyo, ginpahayag ni Iloilo City Fire Marshall Chief Insp. Bartolome Biliran nga naghalin ang kalayo sa puluy-an ni Reynalo Ledesma.
Nag-overloading suno kay Biliran ang koneksyon bangud man sang mga illegal connection ukon naga-jumper.
Aluminum man ang gin-gamit nga kable ni Ledesma nga madasig matunaw, sa baylo nga copper.
Ulihi man ang pagpahibalo sang mga pumuluyo suno kay Biliran angot sa sunog kun sa diin ang traffic aide pa ang nagpahibalo sa sub-station sang Bureau of Fire Protection.
Mahimo suno kay Biliran nga gintinguhaan pa nga tapnaon sang mga residente ang sunog apang madasig ang paglapta sang kalayo.