ILOILO CITY – Illegal drugs ang ginatan-aw nga rason sang pagtaas ang kaso nga murder sa syudad sang Iloilo.
Sa interview sang Bombo Radyo kay Police Captain Shella Mae Sangrines, tagpamaba sang Iloilo City Police Office, iya ginpahayag nga sang damlag lang, nagdamu ang numero sang riding in tandem incidents sa diin lunsay naangot sa illegal drugs ang mga biktima.
Kun basehan ang record sang Iloilo City Police Office humalin sang Enero tubtub Hulyo sang 2018, naglab-ot lamang sa 12 ang kaso nga murder, lima ang homicide, 171 ang physical injury, 19 ang rape, 31 ang robbery, 200 ang theft kag siyam ang carnapping.
Subong naman nga 2019 suno kay Sangirnes, naglab-ot sa 14 ang kaso nga murder, apat ang homicide, 153 ang physical injury, 27 ang rape, 47 ang robbery, 194 ang theft kag lima ang carnapping.
Sang nakaligad nga tuig suno kay Sangrines, naglab-ot sa 447 ang total crime index sa syudad sang Iloilo sa diin 325 ang cleared samtang 285 ang solved.
Subong nga 2019, naglab-ot lamang sa 444 ang total crime index sa diin 261 ang cleared samtang 235 naman ang solved.
May kaangtanan diri, ginpahayag ni Sangrines nga may yara sang pila ka rason kun nga-a nagataas kag naganubo ang krimen sa syudad sang Iloilo.
Lakip na diri amo ang pagpatuman sadto sang Liquor ban kag ang pagmoderno na sang teknolohiya sa diin mas madasig na ang pag-report sang krimen sa Philippine National Police.
