ILOILO CITY – Nagpanawagan ang mga barangay official sang Barangay Asluman, Carles, Iloilo bangud indi sa gihapon masolbar nga problema sang illegal fishing sa ila lugar.
Ini ang kasunod sang natabo nga pagpalupok sang dinamita sa patrol boat sang barangay nga amo ang ginagamit sa pagpatigayon sang seaborne patrol operation.
Ang ginalantaw nga motibo amo ang komosyon nga natabo sa tunga sang mga myembro sang bantay dagat kag sang mga manugpangisda nga nadakpan nga nagakomiter sang illegal fishing.
Wala sa gihapon nakilala ang mga nagpalupok sang dinamita apang hugot ang pagpati sang mga barangay official nga may kaangtanan ini sa natabo nga komosyon kag katuyu-an sang mga suspek nga mauntat na ang operasyon batuk sa ila illegal activities.
Sa interview sang Bombo Radyo kay Punong Barangay Abelardo Montibon sang Asluman, Carles, iya ginpahayag nga madata sa gihapon ang illegal fishing activities sa banwa apisar sang madamo na nga mga memorandum of agreements nga napirmahan ang banwa kag wala sa gihapon na-materialize.
Dugang pa niya, wala sang budget ang local government unit sang Carles sa pagpatigayon sang seaborne patrol operation agud nga matapna na ang iligal nga aktibidad sa kadagatan.
Ginpahayag man niya nga mangin ang iya kaugalingon nga kwarta ang ginagasto na niya agud lamang nga maprotehiran ang kabahin sang Visayan Sea.
