Patay ang masobra 100 ka tawo sang nagsigabong ang isa ka iligal nga oil refining depot sa Nigeria.
Suno sa Youths and Environmental Advocacy Centre, lakip sa mga nagkalasunog sa bunkering site amo ang yara sa mga nagapila nga mga salakyan agud nga magbakal kuntani sang iligal nga gatong.
Nangin madata ang negosyo sang illegal crude refining sa Nigeria bangud wala sang trabaho kag pigado ang mga tawo, apang ini nga negosyo ang may yara sang makamamatay nga kunsekwensya.
Sa sini nga negosyo, ang krudo ang ginakuha sa pipelines nga ginapanag-iyahan sang major oil companies kag gina-refine paagi sa ginhimo-himo nga mga tangke.
Ini nga proseso ang nagresulta sa patal nga mga aksidente kag nangin rason man sang pollution sa mga rehiyon amo man sang oil spill sa uma, creek, kag lagoons.
Sang nagligad lang nga Oktubre, 25 man ka tawo ang napatay sang nagsigabong man kag nagkalayo ang isa ka illegal refinery sa Rivers state. ##
