ILOILO CITY – Nagakadapat gid nga maghatag sang child support ang ginikanan sa ila anak, legitimate ukon illegitimate child man ini.
Sa idalom sang Article 164 kag 165 sang Family Code, mangin ang anak sa luwas ukon ang illegitimate child ang dapat man nga makabaton sang suporta.
Sa interview sang Bombo Radyo kay Atty. Charl Stuyver Moleño, Bombo Abogado, iya ginpahayag nga santo sa Article 194 sang Family Code, ang suporta sa anak ang obligasyon sang mga ginikanan ilabi na kun menor de-edad pa lamang ang anak.
Apang suno sa natungdan, kun suporta sa edukasyon ang pagahambalan, mahimo sa gihapon maka-demand ang anak nga regular na ang edad.
Ginklaro ni Atty. Moleño nga indi solo nga responsibilidad sang isa ka amay ang paghatag sang suporta sa anak kundi, dapat nga ang amay gid kag ang iloy ang maga-provide sini.
Sa tion nga magpamalibad ang amay ukon ang iloy nga maghatag sang suporta, mahimo nga istoryahon ang ginikanan agud nga wala na sang problema ukon mahimo man nga magpasaka sang kaso kriminal bangud sa paglapas sang Republic Act No. 9262 ukon ang “Anti-Violence Against Women and Their Children Act of 2004” bangud sa financial abuse.
Sa kaso sang comedian nga si Paolo Contis kun sa diin, ginpahayag niya sa isa ka interview nga wala siya nagahatag sang sustento sa iya mga kabataan, mahimo ini nga magamit nga ebidensya bangud nga gin-ako sini nga guilty siya.
Apang, ginklaro ni Atty. Moleño nga wala ini nagakahulugan nga mapreso sa gilayon ang aktor.
