Nagsanto ang pahayag sang Iloilo 1st District Engineering Office sa balita sang Bombo Radyo nga madamo sang mga proyekto ang ila opisina nga wala pa makompleto tubtob subong bisan pa nga 2025 pa natapos ang ila mga kontrata.
Ini apisar nga gintawag ni Iloilo 1st District Representative Janette Garin nga “FAKE NEWS” ang amo nga balita sang Bombo Radyo bisan pa nga sa website mismo sang Department of Public Works and Highways ang data.
Sa interview sang Bombo Radyo kay Engr. Carlo John Leysa, Construction Chief sang DPWH 1st District Engineering Office, iya ginpahayag nga sa transparency portal sang DPWH, lunsay wala pa makompleto ang status sang 52 tanan nga mga proyekto nga nagabalor sang kapin 1.1 billion pesos.
Apang sa aktwal nga data sang opisina, 32 na ang kompleto kag 20 ang on-going sa gihapon.
Ang 20 ka mga proyekto nga on-going ang status ang lunsay nag-expire na ang mga kontrata.
Suno kay Leysa, indi updated ang transparency portal sang DPWH bangud may delay sa ila pagpasa sang mga dokumento sa central office kag may delay man sa pag-approve sang central office sang sini nga mga dokumento.
