Ginpabutyag ni Iloilo 1st District Representative Janet Garin nga wala sang kamatuoran ang mga alegasyon nga may bayranay nga natabo sa Kamara nga may kaangtanan sa impeachment complaint batok kay Vice President Sara Duterte.
Sa interview sang Bombo Radyo kay Rep. Garin, iya gin-athag nga indi matuod nga may kahilabtanan ang impeachment case sa kapyerdehan sang pila ka mga kandidato sa idalom sang alyansa ni Presidente Ferdinand Marcos Jr. sa nagligad nga eleksyon.
Suno sa iya, isa siya sa nagpirma sa impeachment complaint, apang indi ini buot silingon nga kontra siya kay Vice Pres. Duterte.
Ginpahayag ni Garin nga ang iya pagpirma isa ka moral obligation kag kabahin sang proseso sa demokrasya.
Dugang pa sang natungdan nga ang impeachment ang may duha ka aspeto kun sa diin ang complainants ginahatagan sang kahigayunan nga e-justify ang ila mga alegasyon.
Samtang, si Vice President Duterte may kahigayunan man nga magpahayag sang iya side kun ang mga alegasyon nga ginahaboy batok sa iya ang wala sang kamatuoran.
Ginkumpirma man sang kongresista nga indi tanan sa Kamara ang nagpirma sa complaint.
Nagpanugyan man ini sa publiko nga indi na dapat palawigon ang mga haka-haka nga may yara sang ginbayaran agud lamang mapatuman ini nga aksyon.
