ILOILO CITY – Isa-isa nga ginsabat ni Iloilo 1st District Rep. Janette Garin ang ginbuy-an nga pahayag ni Presidential Assistant for the Visayas Jane Javellana tuhoy sa natabo sang Marso 22.
Sa interview sang Bombo Radyo kay Garin, iya ginpahayag nga indi big deal ang miscommunication sa baylo, may yara sang misunderstanding nga natabo.
Suno kay Garin, bilang mamalidha kag anay tiglikom sang Department of Health, madamo siya sang may nabaton nga tawag tuhoy sa labing una nga kaso sang Coronavirus Disease 2019 (COVID-19) sa Iloilo rason nga buluntaryo siya nga nagbulig sa national response team kag wala man siya sang ihibalo nga may plano man ang grupo ni Javellana nga magbulig sa pag-transport sang mga medical personnel padulong sa Research Institute for Tropical Medicine.
Ginpahayag ni Garin nga kun indi madayon ang paggamit sang eroplano nga ginapanag-iyahan sang iya pamilya, yara man ang eroplano nanday Jojo Ang kag Alfonso Tan.
Sa pagkamatuod suno kay Garin, wala niya ginsapak ang pabati-bati ni Javellana sa social media tubtub nga madamo na siya sang nabaton nga mensahe kag bangud sa kakapoy sa trabaho, wala na niya mapunggan ang kaugalingon nga mangin emosyonal.
Magluwas diri, ginpanindugan man ni Garin nga fake account ang nagpakilala nga si Cheska Lim bangud suno sa natungdan, ang matuod nga cabin crew ang nakahibalo sang protocol sa pagsakay sa eroplano.
Gin-athag man sang mamalidha nga ginpakitaan siya sang malain nga paminatasan ni Javellana samtang iya man nga ginpakamalaot ang tabloid newspaper nga The Daily Guardian nga amo ang una nga nag-post tuhoy sa reklamo ni Lim batok sa iya.
