Iloilo 2nd District Rep. Gorriceta, nagpanawagan sa publiko nga isulat ang mga reklamo batok sa mga empleyado nga responsable sa indi maayo nga pagdumala sang Western Visayas Sanitarium & General Hospital agud ilakip sa congressional inquiry

ILOILO – Nakit-an kag nabatyagan mismo ni Iloilo 2nd District Representative Michael “Mike” Gorriceta ang indi manami nga working environment sa sulod sang Western Visayas Sanitarium and General Hospital.

On-the-spot nga nagbisita ang Congressman sa nasambit nga ospital antes ang Semana Santa.

Sa interview sang Bombo Radyo kay Representative Gorriceta, iya ginpahayag nga wala siya nagpahibalo sa mga opisyal nga magapadulong ini sa ospital kag sa iya paglibot, nabatyagan niya ang daw kaangay nga indi komportable ang mga empleyado sa ila nga trabaho.

Ginpadulongan man sang mamalidha si Dr. Judy Ann Dumayas, hospital chief, kag ang accountant nga si Mr. Conrad Sorongon agud nga maistorya angot sa problema sa tunga nila.

Apang suno kay Gorriceta, tagsa sa ila nagapati nga insakto sila kag wala gid sang may mapaiway.

Suno sa mamalidha, kun gina-ulikdan kuntani sang duha ang pagserbisyo sa tawo, dapat nga makaistoryahanay sila sang matawhay agud nga maathagan ang isa kag isa.

Dismayado si Gorriceta sa sitwasyon sa sulod sang ospital bangud nagakaapektuhan ang mga empleyado nga ang iban nga tag-tatlo ka bulan nga wala makabaton sang sweldo.

Isa pa gid nga ginakadismaya sang kongresista amo nga kun kaisa wala pa sang bulong sa sulod sang pharmacy sang Western Visayas Sanitarium and General Hospital.

Sa subong, ginahulat na lang ni Gorriceta ang resulta sang imbestigasyon nga ginpatigayon sang fact finding committee nga ginapamunuan ni Department of Health Undersecretary Camilo Cascolan.

Nagpanawagan man ang natungdan kay Department of Health Region 6 Director Adriano Subaan nga magpatunga sa problema sang ospital bangud under ini sang amo nga ahensya.

Nagpangabay man ang mamalidha sa mga empleyado sang ospital nga isulat ang reklamo, ibutang sa dokumento, kag kun may ebidensya ipasa sa iya kun nagapati sila nga may yara sang paglapas ang hospital chief, ang accountant ukon sin-o man nga opisyal sang hospital bangud mabudlay para sa mamalidha nga dal-on ang ining mga complaint sa congressional inquiry kun lunsay hearsay kag verbal lamang.