ILOILO – Pabor si Iloilo 2nd District Rep. Michael Gorriceta sa ginpasar nga House Bill no. 6095 ukon pagpasaka sang election spending per voter sa national kag local candidates.
Ini matapos nga pasado na sa 3rd and final reading sa Kamara ang nasambit nga hagna sa boto nga 213 nga yes, 6 nga no kag 1 ang abstain.
Sa interview sang Bombo Radyo kay Gorriceta, iya ginpahayag nga partikular nga gin-amyendaran ang section 13 sang RA 7166 ukon “An Act Providing for Synchronized National and Local Elections and for Electoral Reforms, Authorizing Appropriations therfor, for other purposes”.
Suno kay Gorriceta nakasaad sa daan nga layi nga ang election spending per voter para sa national candidate ang yara lamang sa P10 samtang P3 naman para sa local candidate.
Sa bag-o lang ginpasar nga hagna, ginpahayag ni Gorriceta nga naglab-ot na sa P50 ang election spending per voter para sa national candidate samtang P30 naman para sa local candidate.
Para sa iya personal nga panan-awan, ginpahayag ni Gorriceta nga indi makabig nga ‘realistic’ ang election spending nga nakasaad sa daan nga layi rason nga nagpabor siya nga ini ang amyendaran.
Samtang, wala pa sang ideya ang natungdan tuhoy sa hagna nga ginaduso nanday Davao City 1st District Rep. Paolo Duterte, Marinduque Rep. Lord Allan Velasco kag ACT-CIS Rep. Eric Go Yap tuhoy sa pag-ilis sang pangalan sang Ninoy Aquino International Airport.
Suno kay Gorriceta, usisaon niya anay ang tuhoy sa proposal sang tatlo ka mga mamalidha antes magdesisyon.
Nahibalu-an nga santo sa proposal sang tatlo, pagatawgon nga Paliparang Pandaigdig ng Pilipinas ang Ninoy Aquino International Airport.
