ILOILO — Indi matupongan ang kalipay nga nabatyagan ni Iloilo 2nd District Representative Michael Gorriceta bangud isa siya sa mga ginakonsiderar nga mangin bise-gobernador ni Iloilo Governor Arthur Defensor Jr. para sa 2025 elections.
Sa interview sang Bombo Radyo kay Gorriceta, iya ginpahayag nga tuman pa ka temprano nga istoryahan ang pulitika bangud may masobra isa pa ka tuig antes hiwaton ini.
Suno kay Gorriceta, aminado nga may preparasyon siya para sa 2025 elections apang pagakonsultahon anay sini ang iya pamilya kag pila ka mga lederes.
Ginpahayag man ang kongresista nga indi niya man luyag nga bayaan ang iya distrito bangud may isa pa ini ka termino.
Gin-athag man ni Gorriceta nga wala pa ini sang plano nga maghalin sa Nationalista Party (NP) bangud allied party man sila sang Partido Federal ng Pilipinas nga Partido man ni President Ferdinand Marcos Jr.
Ginlaragway naman ni Uswag Iloilo Representative Jojo Ang nga kun mangin bise-gobernador si Gorriceta, isa ini sa mangin pinaka-maayo nga bise-gobernadora sang Iloilo.
Gin-athag naman ni Ang nga apisar nga nagapabilin nga bakante ang posisyon sang pagka-bise gobernador sa probinsya sang Iloilo, wala ini sang interes nga magpadalagan sa amo nga posisyon.
