ILOILO CITY – Nagpanawagan si Iloilo Second District Representative Mike Gorriceta sa Department of Health nga resolbahon na sa labing madali nga panahon ang problema sa delayed nga sweldo sang mga personnel sa Western Visayas Sanitarium and General Hospital sa Barangay Inangayan, Santa Barbara, Iloilo.
Sa interview sang Bombo Radyo kay Rep. Mike Gorriceta, iya ginpahayag nga ginatinguha-an man nga ma-upgrade ang facilities sang ospital gani nagakadapat lamang nga i-upgrade man ang ila serbisyo.
Suno pa kay Gorriceta, tuman nga maapektuhan ang serbisyo para sa mga pigado nga nagasalig lamang sa ospital kun wala na sang available nga personnel ukon apektado ang trabaho sang mga personnel bangud sa delayed nga sweldo.
Dugang pa sang natungdan, nakapadala na siya sang kopya sang reklamo sang mga healthcare workers sa opisina ni Department of Health Region VI Director Adriano Suba-an sa paglaum nga i-review niya ini agud nga ma-aktuham
Apang suno kay Gorriceta, wala sa gihapon nakahatag sang update si Director Suba-an sa iya opisina.
Subong nga bag-ong tuig, nagalaum ang mamalidha nga masolbar na ini nga problema agud makapanugod na sang maayo ang ospital.
Nahibaluan nga nagpadala na sang sulat si Gorriceta kay Department of Health officer-in-charge Ma. Rosario Vergiere.
Ang sulat ni Congressman Gorriceta nga ginpetsahan Enero 6 ang gin-copy furnish man sa House of Representative.
