Hugot nga nagpanindugan si Iloilo 3rd District BM Mark Palabrica batok sa ginatawag nga “athlete poaching” sa probinsya sang Iloilo.
Ang athlete poaching amo ang pag-scout sang dalagko nga mga city schools sa mga atleta halin sa probinsya.
Sa interview sang Bombo Radyo kay Palabrica, iya ginpahayag nga nagapangayo na sang awtoridad ang sports sector para sa pag-assign sang consolidated Memorandum of Agreement (MOA) nga nagatuyo nga mag-establisar sang integrated kag comprehensive sports development program sa probinsya.
Ginahatagan naman sang suporta ang amo nga programa agud mapunggan kag indi na madugangan ang athlete poaching.
Dugang pa ni Palabrica, obligasyon sang probinsya nga mapabilin ukon ma-retain ang mga homegrown talents pinaagi sa pagpatuman sang Outstanding Athletes Program sang Iloilo.
Pahayag pa sini nga importante nga ang mga atleta nga ginapondohan kag gina-train sang probinsya amo man ang magarepresentar sa Iloilo sa nagkalain-lain nga kompetisyon bangud madamo sang atleta sa Iloilo ang may potensyal kag talento nga dapat suportahan kag pabakuron.
Sa idalom sang Outstanding Athletes of Iloilo program, nagalaum ang probinsya nga mas mapabakod pa ang sports development pinaagi sa paghatag sang training, coaches kag iban pa nga suporta kag bulig.
Ginpahayag man nga ang mga eskwelahan ang maga-provide sang kontrata para sa mga atleta, samtang ang probinsya naman ang maga-provide sang trainers kag training support.
Dugang pa sini, indi dapat konektado ang mga atleta sa iban nga mga eskwelahan sa gwa sang Iloilo agud mapabilin nga consolidated ang homegrown talents sang mga ini.
