ILOILO — Bukas si Iloilo 4th District Board Member Dominggo Oso, Jr. nga magpadalagan bilang bise-gobernador sa probinsya sang Iloilo.
Ini ang kaangot man sa impormasyon nga wala sa gihapon sang may napilian si Iloilo Governor Arthur Defensor, Jr., nga ka-tandem sa 2025 elections.
Sa interview sang Bombo Radyo kay Oso, iya ginpahayag nga nanamian man ang gobernador sa iya, sa diin ginaduso man ini sang mga kaupod sini sa politika apang wala pa siya sang pinal nga desisyon.
Suno kay Oso, maagi siya anay sa konsultasyon sa iya nga pamilya kag hulaton ang mangin desisyon sang partido sini nga Nacionalista Party (NP).
Ginpahayag man sang natungdan nga hulaton man niya ang desisyon ni Defensor kun luyag niya ini nga makaupod bilang tandem.
Nahibaluan nga matapos na ang termino ni Oso bilang myembro sang Sangguniang Panlalawigan sa diin kun indi na ini makapadalagan, posible nga magaretiro na lang ini sa pulitika.
