ILOILO CITY – Gindayaw ni Iloilo 4th District Representative Ferjenel Biron ang kapulisan sa Western Visayas bangud apisar nga yara sa risgo ang ila nga kabuhi, ginatungdan nila sa gihapon ang ila nga responsibilidad.
Ini ang mensahe ni Representative Biron kadungan sang ginpatigayon nga 32nd Philippine National Police Foundation Day nga ginhiwat sa Police Regional Office VI kun sa diin, nangin guest speaker ini.
Bilang kongresista, ginpasalig ni Biron nga bukas ang iya opisina sa Police Regional Office VI sa tion nga kinahanglan ang iya bulig.
Ginpahanumdom naman ni Biron ang tagsa ka pulis nga mangin professional kag mangin tampad sa tanan nga tion.
Sa bahin naman sang performance sang kapulisan fourth district particular na sa Dumangas, Iloilo kun sa diin, alkalde ang iya anak, ginpahayag ni Biron nga kuntento ini.
Suno kay Biron, madamo sang nadakpan ang kapulisan nga mga durugista ilabi pa nga ang nasambit nga banwa ang may yara sang port nga alagyan padulong sa iban nga lugar.
