Dismayado si Iloilo 5th District Board Member Carol-V Espinosa Diaz matapos nga wala nakapasa sang listahan sang mga beneficiaries ang banwa sang Ajuy para sa cash for work kag cash for training sang Department of Social Welfare and Development (DSWD) Region VI.
Sa interview sang Bombo Radyo kay Board Member Espinosa-Diaz, Chairperson sang Committe on Social Welfare, Housing, Senior Citizens, and Persons with Disability, iya ginpahayag nga sa lima sang banwa nga benepersyaryo sang amo nga programa, ang banwa lang gid sang Ajuy ang wala nakapasa sang ila listahan.
Suno kay Espinosa, nagpatuman sila sang pagsinapol kaupod ang DSWD Region VI, sa diin nagaguwa nga bangud sa wala nakapasa ang Ajuy, indi lang ang ila banwa ang posible maapektohan bangud pati man ang mga nauna na nga nagpasa sang list of beneficiaries.
Ini nangin rason man agud ang Sangguniang Panlalawigan sang Iloilo ang magalantaw sang listahan sang banwa sang Ajuy samtang ginapatigayon na ang cash for work kag cash for training program.
Ginpahayag man sini nga padayunon nila ang pagpangayo sang kopya sa listahan sa banwa sang Ajuy apisar nga nagapadayon ang paghiwat sang programa.
