ILOILO CITY– Naghatag sang pahayag si Iloilo 5th District board member Nielo Tupas may kaangtanan sa ginapahayag insidente sang pagpang-rape nga natabo sa sulod sang iya talatapan sang Mayo 25.
Ang suspek amo si Provincial Guard 2 Rowen Ledesma, 35 anyos samtang ang biktima naman amo si alyas Jane, 45 anyos.
Sa interview sang Bombo Radyo kay Board member Tupas, iya ginpahayag nga nahuy-an siya kag disappointed bangud sa natabo sa iya talatapan.
Pahayag pa ni Tupas nga nahuya man siya bangud sa kadamo sang lugar sa kapitolyo probinsyal sa opisina pa niya ginhimo ang nasambit nga buluhaton.
Kun siya ang magkadto sa sa iya talatapan kun wala sang opisina suno kay Tupas nagalisensya pa siya sa gwardya.
Gin-athag man niya nga kun Sabado kag Dominggo sarado ang iya opisina kag kun may ipakuha man siya sa iya talatapan ginapalisensya niya sa gwardya ang iya staff.
Kun may magkadto man sa iya opisina suno sa board member nagakadapat nga pahibaluon siya bangud siya ang head of office sa nasambit nga talatapan.
Nahibaluan nga nakadetailed sadto kay board member Tupas ang nasambit nga provincial guard apang bangud sa impormasyon nga maukod ini nga nagapangampanya ukon electioneering ginparecall ini kag ginpabalik sa General Services Unit (GSO) sang Disyembre 2018.
