Nagpanumpa na si Iloilo Fifth District Representative-elect Binky Tupas kasunod sang iya pagdaog sa 2025 elections.
Ginpatigayon ang oathtaking sa municipal gymnasium sa banwa sang Barotac Viejo, Hunyo 21.
Nadag-an ni Tupas ang 2025 polls paagi sa 144,169 votes kun sa diin ginlutos sini si Niel Junjun Tupas nga nakaangkon lamang sa 112,856 votes.
Sa interview sang Bombo Radyo sa labing-una nga babaye nga kongresista sang Quinto Distrito, iya ginpahayag nga lakip sa tutukan sang iya nga liderato amo ang character building kag values formation. Ini agud nga malikawan ang pagsaka sang kaso sang Human Immunodeficiency Virus (HIV) sa mga kabataan.
Suno kay Tupas, himuon ini sa pagbinuligay sang local government units, Department of Education (DepEd), kag iban pa nga mga tawo sa komunidad.
Magluwas diri, plano ni Tupas para sa Fifth District nga mapa-asenso ang turismo, mapadayon ang pagtutok sa mga kabarangayan, kag maka-obra sang ospital sa distrito nga gina-manage sang national government.
Dugang sini, mas maayo kun may yara sang airport sa distrito para mas madasig ang implementasyon sang tourism programs.
Daku naman ang papel sang iya bana nga si outgoing Congressman Raul “Boboy” Tupas bilang adviser sang congresswoman-elect.
Sa seremonya, nagpanumpa man si Board Member Dr. Nielito “Doc Darl” Tupas nga naga-represent sang amo man nga distrito. Nagtambong sa kahiwatan ang mayors, vice mayors, Liga ng mga Barangay officials, mga opisyal sang DepEd Iloilo, kag regional directors halin sa rehiyon.#
