Nagapanguna ang Iloilo 6th District Engineering Office sa may pinakadako nga kabug-usan sang infrastructure projects sa probinsya sang Iloilo, base sa data sang Department of Public Works and Highways ukon DPWH.
Naglab-ot sa kapin 2.4 bilyon ang total project cost sang Iloilo 6th District Engineering Office, nga may yara sang 130 ka proyekto. Ang nasambit nga engineering district office nagasakop sa siyam ka banwa sa 3rd District sang Iloilo nga ginabug-usan sang Badiangan, Bingawan, Cabatuan, Calinog, Janiuay, Lambunao, Maasin, Mina kag Pototan.
Ginasundan ini sang Iloilo 3rd District Engineering Office nga may kabug-usan nga 2.3 bilyon para sa 147 ka proyekto. Ang nasambit nga opisina nga nga-nakahamtnag sa Barotac Viejo nagaserbisyo sa mga banwa sang Ajuy, Balasan, Barotac Viejo, Batad, Carles, Concepcion, Estancia, Lemery, San Dionisio, San Rafael kag Sara.
Sa pihak nga bahin, ang Iloilo 1st District Engineering Office may kapin 2.1 bilyon nga balor sang infrastructure projects nga ginabug-usan sang 81 ka proyekto, nga nagasakop sa mga kabanwahanan sang first district sang probinsya.
Samtang, ang Iloilo City District Engineering Office may yara sang 50 ka proyekto nga nagabalor sang kapin 1.8 bilyon, kun sa diin ang iban sini ang ginreport nga na-revoke suno sa data sang ahensya.
Ang Iloilo 2nd District Engineering Office naman nga naka-base sa Sta. Barbara, may yara sang 73 ka proyekto nga may kabug-usan nga balor nga kapin 1.6 bilyon. Sakop sini ang mga banwa sang Alimodian, Leon, Leganes, New Lucena, Pavia, San Miguel, Sta. Barbara kag Zarraga.
Samtang, ang Iloilo 4th District Engineering Office may yara sang 67 ka proyekto nga nagabalor sang kapin 1.1 bilyon.
Base sa Department of Public Works and Highways, kalabanan sa mga proyekto para sa 2025 ang nagalakip sang flood mitigation, road construction, drainage construction, pagpaayo sang access roads kag konstruksyon sang mga multipurpose buildings.
Apang, nagapakita man ang data nga may yara gihapon sang pila ka mga proyekto nga nagapabilin nga on-going, base sa latest update (Marso 31, 2026), bisan pa nga nalab-ot na ang ila gin-target nga completion ukon contract expiry date.
Bukas ang Bombo Radyo Philippines sa anuman nga pagtadlong ukon paathag halin sa Department of Public Works and Highways kag sa mga contractors nga nalakip sa nasambit nga data nagikan a opisyal nga website sang ahensya.
