Iloilo airport, balik sa normal ang operasyon matapos ang pagsadsad sang eroplano

ILOILO CITY – Balik na sa normal ang operasyon sang Iloilo International Airport, matapos temporaryo na-shutdown kaina sang hapon.
Ini matapos nga naaberya ang six-seater plane nga natalana kuntani maghugpa sa airport.
Sa interview sang Bombo Radyo Iloilo, ginpahayag ni Eric Besendario, pinuno sang lloilo Control Tower, gikan sa Bacolod ang eroplano apang nagpalya ang landing gear sang ini ang magahugpa na, rason nga nagsadsad sa runway.
Ginparalisa sini ang operasyon sang bug-os nga airport, nga nagaisahanon lang ang runway.
Wala sang biyahe sang eroplano nga nakahugpa kag nakahalin sa Iloilo Airport sa sulod sang isa ka oras.
Na-divert man sa iban nga airport kaangay sang Cebu, ang iban nga flights sang eroplano nga magahugpa kuntani sa Iloilo International Airport.
Nagbalik lang sa normal ang operasyon sang airport sang makuha na sa runway ang nagsadsad nga eroplano, apang ginreklamo sang mga pasahero ang gindulot sini nga perwisyo.