ILOILO – Handa na ang Iloilo Provincial Government sa ginalauman nga pag-abot sang panibag-o nga batches sang locally stranded individuals umpisa sa Hulyo 16.
Sa interview sang Bombo Radyo kay Iloilo Governor Arthur Defensor Jr., iya ginpahayag nga may yara sang refresher program ang Provincial Health Office agud mapahanumdom sa mga Rural Health Unit personnel ang ila mga obligasyon sa pag-atender sa mga maga-abot nga COVID-19 suspects.
Magluwas diri, ginpahanumdom man liwat ang pagpanaming batok sa COVID-19 paagi sa pagsuksok sang Personal Protective Equipment.
Suno kay Defensor, hulaton lang anay subong kun may yara sang panibag-o nga guidelines nga idagdag ang National Inter-Agency Taskforce.
Una diri suno sa gobernador, nakapasalig naman ang national government nga amat-amaton lang ang repatriation depende man sa ikasarang sang quarantine facility sang isa ka local government unit.
Ginalauman man sang natungdan nga maka-graduate ukon matapos na sang 14-day mandatory quarantine ang una nga batch sang locally stranded individuals sa mga quarantine facilities sa probinsya sang Iloilo pag-abot sang Hulyo 15.
