ILOILO CITY – Ginpangayuan na sang paathag sang Department of Interior and Local Government (DILG) ang mga barangay officials sang Iloilo City nga nag-upod sa lakbay aral sa siyudad sang Naga kag Legazpi.
Sa interview sang Bombo Radyo Iloilo, ginpahayag ni DILG Iloilo City head Atty. Ferdinand Panes nga ginmanduan na ang mga barangay officials nga magsumite sang terminal report kag re-entry plan.
Ini agud masigurado nga mapatuman sang nasambit nga mga opisyal ang ila natun-an sa ila paglakat.
Ginpaandaman man sang DILG ang mga barangay officials nga maghanda sang paathag sa ti-on nga kuwestyunon sang Commission on Audit kun nga-a sa malayo nga lugar sang mga ini ginpili nga magkadto apisar madamo man sang malapit nga lugar nga may best practices.
Una na ginpahayag ni Association of Barangay Captains (ABC) President Reylan Hervias nga ang tinutuyo sang pagpadulong nila sa Bicol amo ang pagtu-on sang solid waste management, anti-drug campaign kag federalism.
Nahibaluan nga masobra P25,000 ang gasto sang kada indibidwal sa nasambit nga lakbay aral nga ginkuha sa pondo sang barangay.
Magluwas sa barangay captains, nag-upod man sa amo nga biyahe ang mga secretary kag treasurer sang barangay samtang may pila man ka punong barangay nga ginpili nga magpabilin sa baylo nga mag-upod sa ginapahayag exploratory learning.