ILOILO CITY – Ginakalipay sang Iloilo Business Club ang pagbawi ni Iloilo City Mayor Jerry Treñas sang Executuive Order (EO) 146 ukon ang pagdumili sang pagbaligya sang makahulubog nga ilimnon pagpatak sang las 2:00 sa kaagahon.
Sa interview sang Bombo Radyo kay Lea Lara, executive director sang Iloilo Business Club, iya ginpahayag nga dako ang mabulig agud magbalik sa normal ang benta sang mga negosyante nga nagabaligya sang mga ilimnon sa syudad.
Suno kay Lara, magapatigayon pa ini sang pagsinapol kaupod ang alkalde agud maistoryahan sang maayo ang pagpa repeal sang EO 146.
Ginalauman suno kay Lara, nga makahimo sang win-win solution ang Iloilo Business Club kag Iloilo City Government agud mapatuman sang insakto ang nasambit nga tikang.
Sa bahin naman sang seguridad, ginpahayag ni Lara nga nakig-angot na sila sa Philippine National Police (PNP), agud indi mabutang sa alang-alang ang kalinong kag katawhay sa Syudad sang Iloilo sa liwat nga pagpahanugot sa pagbaligya sang makahulubog nga ilimnon anuman nga oras.
