ILOILO CITY – Positibo ang Iloilo Business Club nga dako ang mabulig sa pag uswag sang ekonomiya sa tion nga matukod na ang Iloilo Guimaras Negros bridge.
Ang nasambit nga proyekto ang kabahin sang Build-Build-Build program sang Duterte Administration.
Sa exclusive interview sang Bombo Radyo kay Ms Lea Lara, executive director sang Iloilo Business Club, iya ginpahayag nga sa tion nga matukod na ang nasambit nga taytay, madamo sang mga negosyo mga maga uswag.
Suno kay Lara, mas mahapos na lang nga magtabok sa mga isla sakay sang salakyan kag indi na sang sakayang pandagat.
Magluwas sini, ginalauman nga mas madamo man nga hotel kag restaurant ang matukod.
Pinaagi sini, madamo man sang mga mahatagan sang trabaho humalin sa pagtukod sang taytay tubtub sa pagtukod sang mga negosyo.
Nahibaluan nga natapos na ang feasibility study sa Iloilo-Guimaras-Negros Bridge apang ginbalik ini sang Department of Public Works and Highways sa consultant sang China bangud tuman ka mahal ang kada kilometro sang apat ka lane sang taytay.
Nagabalor sang P11 billion per kilometer nga gastuhon sang gobyerno sa pagtukod sang nasambit nga taytay.
Ginabanta nga yara sa P212 billion ang mahimo magasto sang gobyerno sa pagpatukod sang nasambit nga taytay.
Ginalantaw nga maumpisahan na sa 4th quarter sang 2021 kag magalawig ini sang anom ka tuig antes matapos ang proyekto.
Sa tion nga pasado na ang estimated nga balor sang taytay, ipadala ini gilayon sa National Economic and Development Authority kag mismo ang ahensya ang maga-assess kun bala i-aprub ang feasibility study.
Matapos nga ma-aprubahan, patigayunon ang bidding kag ang engineering design para sa nasambit nga taytay.
Ginalantaw nga sa tuig 2026 mahimo na nga matapos ang nasambit nga taytay.
