Ginpaalinton ni Uswag Ilonggo Partylist Congressman Jojo Ang ang naistoryahan sini kaupod sa Department of Public Works and Highways (DPWH) nga madayon gid ang ginaduso nga Iloilo-Capiz-Aklan Expressway.
Sa interview sang Bombo Radyo kay Ang, iya ginpahayag nga kinahanglan ang feasibility study para sini bangud ginapangitaan pa subong sang alagyan nga cost-efficient ukon wala nagakinahanglan sang tuman gid ka daku nga pondo.
Suno kay Ang, ginaduso kuntani sang nagligad nga tuig nga kinahanglan na butangan sang pondo ini nga proyekto para sa General Appropriations Act subong nga 2024 apang ginsiling sang DPWH nga indi lang anay bangud kanugon sang pondo kun indi pa magamit subong nga tuig.
Matandaan nga sang nagligad nga adlaw, nagpungko si Ang sa isa ka consultative meeting kaupod si Secretary Manual Bonoan kun sa diin naistoryahan man ang Panay-Guimaras-Negros Bridge.
Ginpahangop sini kun madayon ang expressway, mas mapadasig ang byahe halin sa Iloilo pakadto sa Aklan, mas mapahapos ang access sa mga serbisyo kag mapasanyog man ang ekonomiya sa bilog nga Panay.
Iga-feature sa sini nga proyekto ang state-of-the-art, full-access controlled toll expressway nga may apat ka lanes. Magalaba ini sang 210 kilometers kag maga-konekta sang duha ka syudad kag 20 municipalities sa tatlo ka mga probinsya.
Matandaan nga nalakip ini nga proyekto sa priority list sang Marcos administration bangud nalista ini anay sa Public-Private Partnership (PPP) projects sang DPWH sang nagligad nga tuig nga ginaduso nga iimplementar sa idalom sang Republic Act No. 6957, as amended (Build-Operate-Transfer law) sang Enero subong nga tuig.#
(Photo: Uswag Ilonggo Partylist)
