ILOILO CITY — Nagaplano ang Iloilo City Disaster Risk Reduction Management Office (CDRRMO) nga magpatuman sang air quality test sa syudad kasunod man sang paglupok sang Bulkan Kanlaon.
Sa interview sang Bombo Radyo kay Donna Magno, Department Head sang nasambit nga talatapan, iya ginpahayag nga antes sila magpatuman sang amo nga tikang, konsultahon anay sang opisina ang Philippine Atmospheric, Geophysical, and Astronomical Services Administration (PAG-ASA).
Suno kay Magno, istoryahan ang mga technolohiya nga posible gamiton sa pagpatuman sang air quality test.
Ginpahayag man sini nga santo sa datus sang Philippine Institute of Volcanology and Seismology (PHIVOLCS), wala pa sila sang na-monitor nga naglab-ot sa Iloilo City ang ash fall sugod nga naglupok ang Mt. Kanlaon.
Nagalaum naman ang natungdan nga wala sang may matabo nga malain sa syudad kaangot sa paglupok sang bulkan, sa diin, padayon man ang ila nga pagbantay sa wind status sang syudad.
Nagpasalig naman ang talatapan nga gilayon magahatag sang impormasyon sang sitwasyon sang hangin sa syudad kun matapos ang ila konsultasyon sa pila ka mga ahensya.
Nagpaathag naman ang Iloilo City Health Office nga wala pa sila sang ihatag nga N95 face mask kun hinali makalab-ot sa syudad ang ash fall.
Suno kay Dr. Anabelle Tang, Department Head sang nasambit nga talatapan, iya ginpahayag nga kun maggamit man sang N95 face mask, kinahanglan anay ini nga mapaidalum sa test agud masiguro kun ini ang safe nga gamiton kag may ikasarang nga protektahan ang ikaayong lawas batok sa abo sang bulkan.
Ginpahayag man sini nga kinahanglan nga indi tuman ka hugot kag indi man halog sa istura ang face mask nga gamiton agud mangin epektibo ini.
