ILOILO CITY – Amat-amat na nga gin-demolish kag ginpang-kudalan ang Iloilo Central Market kahapon agud maghatag ligwa sa patigayunon nga rehabilitasyon sang Iloilo City Government.
Sa interview sang Bombo Radyo kay Maricel Mabaquiao, pinuno sang Local Economic and Enterprise Office, iya ginpahayag nga may ginpahamtang ini nga pwerta, pananglitan may nabilin nga gamit ang mga manugbaligya sa sulod.
Suno kay Mabaquiao, naka amat-amat naman nga nagpwesto ang mga manugbaligya sa ila tagsa ka mga temporary stalls.
Ginpahayag dugang sang natungdan nga ginklaro na niya sang makapila ka beses sa mga manugbaligya nga sila mismo ang responsable sa pagbakal sang kinahanglanon nga materyales agud i-secure ang mga gamit kag baligya kaangay sang pwertahan.
Kumporme naman ang pila ka mga manugbaligya sa ila pagsaylo sa mga temporary stalls halin sa Iloilo Central Maket .
Ini bangud mas komportable, matinlo, kag mas functional ang drainage sang mga temporary stalls.
Sa interview sang Ruby Beniegas-Serano, nagabaligya sang Batchoy sa nasambit nga merkado, iya ginpahayag nga ginkalipay sini ang katinluon sang bag-o nga lugar kun sa diin accessible ang tanan kaangay sang kuryente kag comfort rooms.
Suno kay Serano, tuman ka importante nga matinlo ang lugar bangud nagaserbe ini sang pagkaon sa mga customers.
Sa subong kontento ang natungdan sa ila sitwasyon.
