ILOILO CITY – Ginpasirado na ang Iloilo Central Market agud maghatag ligwa sa ginapatigayon nga rehabilitasyon.
Sa interview sang Bombo Radyo kay Maricel Mabaquiao, pinuno sang Local Economic and Enterprise Office, iya ginpahayag nga, naghatag sang konsiderasyon ang opisina pinaagi sa paghatag sang extension nga isa ka adlaw para sa mga manugbaligya nga naghingagaw pa sa pagkuha sang tagsa ka mga kagamitan.
Nahibaluan nga Mayo 15 kuntani natalana ang pagpasira sang merkado.
Suno kay Mabaquiao, wala ini nagkulang sa pagpa-alinton sa mga manugbaligya nga magsaylo na sa temporary stalls kag pag-cater sa tanan nga mga palamangkutanon sang mga ini.
Matapos ang paghalin sang mga manugbaligya, ginkudalan na ang area kun sa diin may yara nalang sang isa ka ang entrada kag guluwaan ang merkado.
Sa subong, yara na sa mga tagsa sa mga temporary stalls ang mayoriya sang mga manugbaligya.
Samtang, nagpangayo naman sang pagsaylo ang natungdan sa mga manugbaligya kag naghingyo sang paghangop sa huol nga matuga sang redevelopment sang Iloilo Central Market.
Padayon naman nga ginareklamo sang mga manugbaligya sa Iloilo Central Market ang makitid nga espasyo sang temporary stalls.
Ini matapos nga naumpisahan na ang rehabilitasyon sang mga merkado sa syudad nga isa sa mga proyekto sang Iloilo City Government kaupod ang private-public partnership.
Sa interview sang Bombo Radyo kay Sir Pok, isa sa mga manugbaligya sang nasambit nga merkado, iya ginpahayag nga indi makaigo ang pila sa mga gamit sini sa temporary stalls, gani ginpakamaayo nalang sini nga ipauli ini sa ila balay.
Suno kay Sir Pok, wala pa ini nakasaylo sa iya temoprary stall bangud wala pa natapos ang pagkay-o kun sa diin naparalisar gid ang iya mga produkto bangud wala pa ini sa display sang lugar.
Sa subong, wala pa nabal-an sang natungdan kun san-o ini makasaylo sa stall.
