ILOILO CITY–Dismayado si Iloilo City Administrator Atty. Hernando Galvez sa performance sang Public Safety Transportation and Management Office (PSTMO).
Ini matapos nga natukiba ni Galvez nga may mga ordinansa ang syudad nga wala ginpatuman sang PSTMO.
Suno kay Atty. Galvez, magluwas sa anti-barker ordinance, wala man napatuman ang truck ban ordinance nga ginpasar sang 2002.
Dugang pa ni Galvez, wala ma-regulate ang mga byahe sang truck sa syudad sang Iloilo nga ginatudlo isa sa mga rason sang paggutok sang mga dalanon sa syudad.
Nabutang sa ordinansa nga ang PSTMO amo ang magapatuman sini gani kanugon sunu kay Galvez ang kakapoy sang mga konsehal nga nagdihon sang amo nga ordinansa kun indi man lang ini masunod.
Nagalibog naman ang ulo sang administrador sang syudad kun ano ang rason sang indi pagpatuman sang mga ordinansa.
Ginapanindugan man ni Galvez nga ang mga ordinansa ang kinahanglan nga ipatuman.
Nahibalu-an nga ginkontra ni Galvez ang paghatag sang “human considearation” ni Jeck Conclu, pinuno sang PSTMO, sa mga barkers sa syudad.