ILOILO CITY – Gin-athag ni Iloilo City Administrator Atty. Hernando Galvez nga indi maubos ang P125 million nga calamity fund sang syudad sang Iloilo para sa water supply.
Sa interview sang Bombo Radyo kay Atty. Galvez, iya ginpahayag nga indi maubos ang calamity fund sang syudad para lamang sa paggasto sa pagpanghatag sang tubig sa mga pumuluyo.
Sa pagkamatuod suno kay Atty. Galvez, may yara na sang mathematical computation kun pila ang magasto sang syudad sa tion nga ideklarar ang State of Calamity.
Ang maximum nga mahimo gastuhon sang syudad ang nagalab-ot sa P8 million bangud nga magabulig lamang ang syudad kun water distribution ang pagahambalan.
Gintawag man sang City Administrator nga pagpatalang sa publiko ang pahayag ni Iloilo City Lone District Cong. Jerry Treñas nga maubos ang calamity fund sang syudad bangud nga may yara sang political interest ang Espinosa Administration.
Ginpromisa man sang natungdan nga indi siya kawatan, wala sang handum nga mangawat kag kontento sa kun ano man ang may yara siya subong.
