ILOILO CITY – Magapatrolya kag mangdakop ang team sang Iloilo City Agriculture Office sa mga nagapangpukot nga manugpangisda sa Iloilo River.
Sa interview sang Bombo Radyo kay Mr. Iñigo Garingalao, officer-in-charge sang nasambit nga opisina, iya ginpahayag nga magalibot ang ila team kon kaagahon sa Iloilo River agud ma-monitor ang mga manugpangisda nga nagapatigayon sang illegal fishing.
Suno kay Garingalao, wala sang problema ang pagpamunit sa Iloilo River apang may yara sang mga manugpangisda nga daw ubuson na ang isda sa pagpamukot.
Nagdonar man suno sa iya sang barko ang Bureau of Fisheries and Aquatic Resources (BFAR) nga amo ang gamiton sang nasambit nga talatapan sa pagpatigayon sang monitoring sa Iloilo River.
Pahayag ni Garingalao, nagpakig-angot man ang ila talatapan sa Philippine Coast Guard kag Philippine National Police agud magbulig sa pagtapna sa illegal fishing sa Iloilo River.
