Gina-anunsyo ni Iloilo City Mayor Raisa Treñas nga magabalik na ang klase kag opisina sa siyudad, Lunes, Hulyo 28, 2025, matapos mangin maayo na ang sitwasyon halin sa epekto sang Bagyo kag habagat.
Sa iya Facebook post, ginpasalamatan ni Mayor Treñas ang tanan nga kabahin sang Emergency Operations Center, mga barangay response teams, kag volunteer groups nga nagtiner sa serbisyo sa tunga sang kalamidad.
Base sa ulihi nga data sang LGU, 94 ka barangay ang naapektuhan sang baha, apang 83 na ang nagsubside.
May 11 ka kahoy nga natumba, 74 ka balay nga na-damage, kag 1,127 ka pamilya ukon 3,754 ka indibidwal ang na-evacuate.
Tanan nga evacuees nakapauli na, samtang nagapadayon ang relief operations kag assessment sang City Social Welfare and Development Office.
Sa bulig sang City Health Office, nakapanagtag sang 101 ka tetanus shots, medical assistance sa kapin 800 ka pasyente, kag doxycycline sa kapin 50,000 ka residente.
Naglab-ot naman sa 54,906 ka tawo ang naapektuhan sang kalamidad, pero nagapanumbalik na sa normal ang operasyon.
