ILOILO CITY – Ginklaro sang Iloilo City Budget Office nga wala sang nagakatabo nga delay sa ila opisina sa pagproseso sang sweldo sang mga empleyado sang syudad.
Sa interview sang Bombo Radyo kay Viminale Capulso, department head sang Iloilo City Budget Office, iya ginpahayag nga gina-aprubahan sang ila opisina mismo sa adlaw nga ginapasa sa il ang mga dokumento.
Dugang pa niya, ang assistant department head ang ginhatagan na niya sang otoridad nga magpirma sang mga papeles sa tion nga wala siya sa opisina agud nga indi na maatrasar ang sweldo sang mga empleyado.
Suno pa sa natungdan, naga-overtime ang mga empleyado sa iya opisina agud nga matapos ang tanan nga mga dokumento.
‘YEAR END’
Samtang, gin-ako sang pinuno sang Iloilo City Accountant’s Office nga may yara sang nagakatabo nga delay sa mga issuances sang opisina bangud nga katapusan na sang tuig kag nagahingagaw sang katapusan nga banking day.
Sa interview sang Bombo Radyo kay Iloilo City Accountant Michelle Lopez, iya ginpahayag nga apisar sini, ginatinguha-an nila nga mapagwa sa gilayon ang mga dokumento nga ginapasulod sa ila opisina.
Suno pa sa iya, may yara sang nagakatabo nga delay kun may yara sang mga sala sa dokumento kag may kulang pa nga requirements.
Sa payroll, sa tion nga may kulang, gilayon nga ginapahibalo ang payroll maker sang tagsa ka opisina.
