ILOILO CITY – Magapatigayon ang City Tourism and Development Office sang three-hour tour nga maga-showcase sang Iloilo City by night.
Sa interview sang Bombo Radyo kay City Tourism Officer Junel Ann Divinagracia, iya ginpahayag nga ang nasambit nga plano ang ginalauman nga umpisahan sa Setyembre.
Suno kay Divinagracia, magluwas sa renovation kag enhancement sang Molo Complex, ginaplano man nila ang pagbutang sang mga nagkalain-lain nga suga sa mga heritage building sa Calle Real sa J.M. Basa Street, Iloilo City Proper agud mangin maduagon sa gab-i.
Ang Molo Complex ang ginalakipan sang St. Anne Parish Church, Molo Mansion heritage house, kag Molo plaza.
Ginpahayag ni Divinagracia nga sadto anay, nagpatigayon na sila sang night tour kag luyag nila ini nga buhion liwat.
Sa tion sang gab-i suno sa natungdan, mas makapamati ang mga turista sang istorya sang destinasyon bangud wala sang traffic kag gamay lang ang nagalagaw nga mga tawo.
Ang itinerary nga magadugay sang tatlo ka oras ang ginalakipan sang early dinner sa beach sang Villa, Arevalo district, pagasundan sang stopover sa Molo Complex, labay sa Esplanade kag deretso sa new business district sa Mandurriao.
Ang masunod nga padulungan amo ang Jaro district labay sa National Shrine of Our Lady of Candles sa Jaro Metropolitan Cathedral kag Casa Mariquit heritage house, sunod sa La Paz district kag Calle Real, labay sa Casa Real sang Iloilo Provincial Capitol kag balik sa Esplanade.
Mahimo man nga mag-hire ang mga turista sang accredited tour guides ukon makig-angot sa City Tourism and Development Office.
