Samtang nagahilapit ang Septyembre 30 nga deadline sang voter’s registration, indi magnubo sa 1,000 ang na-rekord nga nagapa-rehistro sa syudad sang Iloilo kada adlaw.
Sandig sa data sang lloilo City Commission on Elections (Comelec), kahapon, Septyembre 25, narekord ang 1,527 ka registrants — pinakamataas nga single-day turnout halin sang nag-resume ang rehistrasyon sang Septyembre 6.
Sa interview sang Bombo Radyo kay City Election Officer Mr. Jonathan Sayno, iya ginpahayag nga samtang amo sini kataas nga numero ang nagapa-rehistro kada adlaw, nagakahulugan ini nga madamo gihapon ang nagakinahanglan sang extension.
As of September 25, yara na sa 14,534 ang nakapa-rehistro sa City Comelec.
Ginalauman nga magadangat ini sa 18,000 pag-abot sang Septyembre 30.
Idugang ini nga numero sa April 2021 record nga 304,400 ka mga registrants sa syudad nga Iloilo.
Sa pila ka satellite registration site sa Iloilo City, nagaumpisa pila ang mga tawo 8:00 sa gab-i apisar 8:00 sa aga pa nagabukas ang registration.
