Liwat nga nagpahanumdom ang Iloilo City Commission on Elections (COMELEC) sa mga kandidato kag supporters nga likawan ang pagbutang sang mga campaign materials sa guwa sang common poster area.
Sa interview sang Bombo Radyo kay Atty. Pinky Jevini Tentativa, Election Officer IV sang Iloilo City COMELEC, iya ginpahayag nga lakip sa mga indi dapat pagbutangan sang mga tarpaulins amo ang barangay hall, covered gyms, tanod outpost, lakip na ang mga waiting sheds, public sidewalk, poste, ilabi na sa mga kahoy.
Suno kay Tentativa, may mga nakadesignar nga mga lugar para sa individual, national and local candidates kon sa diin, may yara sang pito ka mga public plaza sa syudad nga amo ang common poster area.
Ginpahayag man sini nga nagapatuman sang ‘weekly oplan baklas’ ang talatapan apisar pa nga holiday.
Gintuad man sang natungdan nga masami rason sa pagkakas sang ila nga tarpaulins amo ang oversize nga sukol sini.
Nahibaluan nga santo sa pagsulundan sang talatapan, ang tagsa ka kandidato ang mahimo magbutang sang ila campaign posters sa designated area nga may sukol nga 2 feet by 3 feet nga kasangkaron.
Lakip na man sa rekisitos ang pagbutang sang ‘paid for by’ sa tagsa ka poster.
Ginadumilian man ang tanan nga sahi sang pagpangampanya ang sa Abril 17 tubtob 18, 2025 nga isa ka balaan nga adlaw sa pag-obserba man sang Semana Santa sang simbahang-Katolika.
Nagpanugyan man ini sa mga kandidato nga antes ang adlaw sang eleksyon kag adlaw mismo sang eleksyon sa Mayo 11 kag 12, 2025, ginadumilian ang magpangampanya, sa social media man ukon sa personal.
Nahibaluan nga ang sin-o man ang indi magsunod sa amo nga mga pagsulundan ang magapangatubang sang kaso sa paglapas sa Comelec Resolution No. 11086 ukon ang Republic Act No. 9006 ukon Fair Elections Act.
