ILOILO CITY- Wala pa nag-umpisa ang Commission on Elections- Iloilo City sa pagpangbaklas sang mga campaign posters sang mga national candidates nga nakabutang sa indi designated nga common poster areas.
Sa interview sang Bombo Radyo kay Mr. Jonathan Sayno, Election Assistant II sang Iloilo City COMELEC, iya ginpahayag nga may yara pa sila sang patigayunon nga mga pagsinapol kaupod ang Philippine National Police may kaangtanan sa patigayunon nga simulation exercise kag security measures para sa nagahilapit nga eleksyon.
Suno kay Sayno, may yara man sila sang patigayunon nga peace covenant signing para sa mga local candidates.
Pahayag niya, posible nga sa Huwebes,Pebrero 10, makaumpisa na sila sang pagpangbaklas.
Nagpaandam naman ini sa sin-o man nga nagapangtapik sang campaign posters sa mga indi designated common poster areas nga mahimo sila nga mapreso kag mapasakaan sang kaso angot sa paglapas sa Fair Election Act kun sa diin mahimo gid nga mapasakaan sang kaso ang kandidato nga nagasugo agud mangtapik sang mga campaign posters.
