Wala na ginkakibot sang Iloilo City Comission on Elections (COMELEC) ang pagdugok sang mga tawo sa pinakaulihi nga adlaw sang voter’s registration para sa 2025 midterm elections.
Sa interview sang Bombo Radyo kay Atty. Pinky Jevini Tentativa, election officer IV sang Iloilo City COMELEC, iya ginpahayag nga naanad na sila sa amo nga sitwasyon sang mga pumuluyo bangud masami nga nagadugok sila ilabi na sa pinakaulihi nga adlaw sang pagparehistro.
Suno kay Tentativa, apisar nga ano ka lig-on ang ila pagpakig-angot sa mga barangay kag eskwelahan, mas ginapili sa gihapon sang mga residente nga magparehistro sa pinakaulihi nga adlaw.
Ginklaro man sini nga ang mga naabotan sang cut-off sang registration ang makapadayon sang ila pagparehistro sa masunod nga tuig sa liwat nga pagbukas sang voter’s registration sang COMELEC.
Nahibaluan nga yara sa 18,000 ang mga aprubado nga registration sa syudad sugod sang nagbukas ini sang Pebrero.
May yara naman sang nabilin nga 18,000 nga mga registration nga ginaproseso sang talatapan agud matumod kon qualify ukon indi.
