ILOILO CITY – Nagpasar sang duha ka resolution ang Iloilo City Council may kaangtanan sa pag-apruba sa hagna nga ginduso ni Iloilo City Lone District Representative Julienne ‘Jamjam’ Baronda sa diin tungaon sa duha ka distrito ang syudad sang Iloilo.
Sa interview sang Bombo Radyo kay Iloilo City Councilor Atty. Rommel Duron nga amo ang Chairman sang Committee on Rules, Ordinance, Resolutions, Good Government and Public Accountability sa Iloilo City Council, iya ginpahayag nga ang una nga resolution nga ila ginhisugtan amo ang pagsuporta sa amo nga hagna nga malakip sa District 1 ang mga distrito sang Jaro, La Paz kag Mandurriao samtang lain naman nga legislative district ang bug-usan sang City Proper, Lapuz, Arevalo kag Molo.
Sa ikaduha nga resolution nga ipasar suno kay Duron, halin sa 12, himuon na nga 16 ang myembro sang Iloilo City Council kag tungaon sa tig-walo sa tion nga mangin duwa na ka distrito ang syudad sang Iloilo.
Suno kay Duron, pabor gid ini sa pagpasangkad sang syudad sang Iloilo.
Ini bangud kun mahimo, mangin duha na ang representative sa syudad sa House of Representatives kag Kamara kag bentaha para sa mangin budget sa kada distrito agud mapasar ang mga proyekto sa pagpauswag sang ekonomiya.
Indi malikawan suno kay Duron nga may yara sang gamay nga pulitika angot sa pagtunga sang syudad sa Iloilo sa duha ka distrito apang nakadepende na ini sa panan-awan sang mga tawo.
Mas importante suno sa iya ang kamaayuhan sang kabilugan kag ang para sa benepisyo sang kadam-an.
Sa subong, suno sa natungdan, ginahulat nalang ang bersyon sang senado sa pagpasar sang nasambit nga hagna.
Nahibaluan nga aprubado na sa Third kag Final Reading sa Kamara ang House Bill No. 8477 nga substitute bill sang House Bill 3074 nga nagatuyo mag-re-apportion sang lone district sang Iloilo City.
