ILOILO CITY – Ginahulat nalang sang Iloilo City Council nga mapirmahan ni Iloilo City Mayor Jerry Treñas ang prangkisa nga ginhingyo sang United Association of Cockpit Owners and Operators of the Philippines, Incorporated agud nga magpatigayon sang online bulang.
Una na nga ginpahayag nga nahisugtan na sang Iloilo City Council nga matagaan sang isa ka tuig nga prangkisa ang operator sa diin ini amo ang delay broadcast and data stream.
Sa interview sang Bombo Radyo kay Councilor Jojo Javellana nga amo ang chairman sang Committee on Games, Amusement sa Iloilo City Council, iya ginpahayag nga 3 tubtub 5 lamang ka segundos ang mangin delay sang livestreaming kaangay sang hampang sa boxing ni Manny Pacquiao.
Suno kay Javellana, ginahulat nalang sang Iloilo City Council nga mapirmahan sang alkalde sang syudad sang Iloilo ang prangkisa agud nga makahimo man sila sang schedule sa pagpatigayon sang online nga bulang.
Samtang, gin-athag naman sang konsehal ang rason kun ngaa wala nila maimbitahan ang Iloilo City Department of the Interior and Local Government (DILG) sa pagpatigayon sang committee hearing kun aprubahan ang hingyo nga prangkisa sang UACOOP sa pagpatigayon sang online nga bulang.
Ginpahayag ni Javellana nga indi naman “necessary” bangud ginasunod nila ang tanan nga pagsulundan nagikan sa DILG sa pag-apruba sang prangkisa sang operator.
Nagapati man si Javellana nga wala man siya sang may nakita nga huol sa prangkisa bangud ang tanan nga pagsulundan sang DILG kag Inter-Agency Taskforce ang ila man nga ginsunod.
